Tokante VISHON

Transformá presente pa un mihó futuro.

Un promesa ku nos komo Vishonario ke hasi na tur siudadano di Kòrsou. Nos por transformá presente únikamente si nos analisá nos situashon aktual i rekonosé ku nos mester bai pa un forma di polítika nobo. Un mihó futuro kaminda nos ta lanta para, hala un strepi i habri nos kurason pa e arte di mira sin límite. Un vishon ku no lo ta na vigor pa kuater aña so, pero ku lo habri kaminda pa generashon nan ku lo bini despues.

Nos vishon ta bini for di e sintimentu ku ta rekordá nos ku tin mas den bida ku e situashon aktual. Komo ser humano nos tur tin un propósito i nos ta karga e responsabilidat pa honra e sintimentu aki. Banda di nos metanan polítiko VISHON ta tuma responsabilidat pa representá e deseonan i metanan di e siudadanonan di Kòrsou, for di un perspektiva humanitario.

E fundeshi di nos di nos movementu ta basá riba e prinsipionan di hende na promé lugá. un mente komersial fuerte i mas importante kresementu ekonómiko. Nos ta pará habrí pa oportunidatnan nobo i ta balente sufisiente pa tuma desishonnan tribí. Inovashon ta parti di nos DNA.

Pa por representá nos komunidat nos ta keda skucha, opservá i informá. Hopi biaha ora nos puntra nos hóbennan i grandinan unda nan ta kere ku Kòrsou lo ta aki 10 aña, e kontesta mas komun ta: “mi no sa”. Un kontesta lógiko por sierto, paso na final di dia nos no sa kiko futuro ta trese.

Nos por imaginá kuantu ku nos ke pero ta importante pa kada siudadano por tin nan propio vishon. Nos mester traha riba konfiansa, krea oportunidat i traha espasio pa desaroyo. Ora un persona sa kon pa honra su vishon i tin bista riba su propio deseo i soñonan, nos por desaroyá un nashon ku siudadano vishonario.

Konfiansa i relashon ta e yabinan klave pa nos logra nos metanan. Nos ta konfia ku nos metanan lo kristalisá ora nos fortalesé nos relashon ku Reino Hulandes i dor di invertí den un laso mas fuerte ku Hulanda ku ta basá riba komprondementu, rèspèt mutuo i kresementu. Nos ta kere ku nos por bira mas [zelfvoorzienend] i ménos dependiente di otro nan pa nos logra nos meta nan. Sin embargo, nos mester traha huntu i forma aliansanan fuerte.

Ora bo wak kompanianan i nashonnan ku ta sumamente eksitoso, bo ta mira ku nan éksito ta basá riba nan abilidat pa aseptá kambio. Nan ta asepta yudansa, brasa kambio i ta para habrí pa inovashon.

Nos tambe!

TOKANTE miles

“Si tin un hende ku ta duda den e vishon di su pais, si tin hende ku ainda ta duda den e fundeshi ku nos antepasadonan a laga atras òf ta kuestioná e poder di nos demokrasia.

 Awe mi anunsio lo ta boso kontesta”.

Moises Schoobaar mi welo-

 

Miles MerceraKu VISHON mi ta yama ayó na polítika tradishonal i mi ta habri kaminda pa polítika vishonario. Mi ta mira komo mi deber pa demostrá ku tin lidernan kapas pa guia e pais aki i ku no tin espasio pa duda. Un soño pa planta e simianan pa hasi Kòrsou mas grandi ku kualke poder na mundu.

Mi entrada den e arena polítiko ta pasó mi ta mira nos potensial komo pais. Ta pa e pais aki, mi ke lucha, pasó ta aki mi a haña mi formashon i ta aki mi a haña oportunidatnan ku niun otro pais na mundu lo no por a brinda mi. Mi hendenan ta duna mi speransa i balor di bida. 

 E kultura riku di Kòrsou a siñami ku ora di kai nos por kai huntu pero ku ora di lanta bèk nos tin di hasi esaki huntu tambe. Nos por kritiká, pero ku solushon. Nos mester adoptá e mentalidat di inspirá otro pa saka e mihó di nos mes. E pida baranka akí meskos ku nos bida, ta un so nos tin di dje.

 E meresé bo voto Vishonario.

 Mi a dal e promé paso i awor ta keda na abo pa analisá i puntra bo mes unda bo ke ta aki 10 aña i dal e paso huntu riba e kaminda ku VISHON.