Responsabilisá maneho: Dikon ta Gobièrnu mes mester paga pa internet na skol?

Siendo anteriormente a deklará ku UTS/FLOW lo sòru p’esaki grátis

 

Willemstad, 10 di Mart 2021 – Resientemente aktual minister di Enseñansa, Siensia, Kultura i Deporte (ESKD), sr. Steven Croes, a firma un akuerdo pa kuminsá e promé fase di e proyekto di digitalisashon di enseñansa. Esaki ta algu ku riba su mes sin mas nos ta aploudí. Sinembargo ta nesesario duna klaridat ta dikon aworaki ta resultá ku Gobièrnu mes mester paga pa suminstrashon di internet, si anteriormente a deklará ku UTS/FLOW lo sòru pa esaki grátis.

Na 2019 ora di benta di nos kompania di komunikashon nashonal, ta ku bastante fanfara e minister di Tráfiko,Transporte i Planifikashon Urbano, Zita Jesus Leito a splika ku e kumpradó di e kompania lo pèrkurá pa skolnan na Kòrsou risibí internet grátis. Tabata un di e argumentonan pa yuda hustifiká benta di un kompania nashonal i ku e lo trese algu adishonal bon pa pais. Ta kon anto Minister di Enseñansa por sali deklará na un televishon lokal, ku awor gobièrnu mes mester paga pa suminstrashon, paso e kalidat di internet ku UTS/FLOW por manda pa e skolnan lo no ta di e nivel pa karga ku e digitalisashon na skolnan. Ta kiko a negoshá i firma ku UTS/FLOW anto? Es mas, kiko esaki ta bisa di kalidat ku e kompania ta duna aktualmente? Minister sali splika komunidat esaki!

Nos sa ku pa hopi aña kaba fondonan aloká riba presupuesto di pais pa enseñansa no ta yega pa kubri tur nesesidat. Direktivanan di skol tambe no ta hasi un sekreto ku fondonan risibí no ta yega pa kubri ku tur gastu di luna. Entre nan asta mantenshon di edifisio a kai atras pa por sobra sèn pa paga koriente por ehèmpel. Ta pesei mes awor tin tantu retraso den mantenshon, te ku Hulanda ta bai duna sèn pa esaki. Kon ta garantisá término largu ku fondonan nesesario ta keda aloká pa paga pa e internet aki awor? Enfoke di gobièrnunan di turno tabata ku boka so pa enseñansa, paso ora di aloká fondo a laga hopi di deseá.

Enseñansa ta fundeshi di e pais aki anto si nos ke progresá di bèrdat mester invertí den nos muchanan. Mi ta aploudí tur paso pa yuda yega e direkshon ei, pero paso mester  ta konsistente i responsabilisá na pueblo. No komunikado bunita pa gana simpatia i voto pa despues kos bai pega. Ta inaseptabel pa Gobièrnu keda sin sali i splika e maneho hibá.  Kiko a negoshá ora di bende UTS pa ku internet na skol? Ki kalidat i kantidat di internet ta haña grátis i pa kon largu? Dikon awor e kompania no por duna internet pa e proyekto digitalisashon den totalidat? Pakiko mester a bai destaho públiko pa pone infrastruktura?  Ki e konsekuensia finansiero ta pa presupuesto i kon a garantisá kontinuashon di e proyekto aki?

Share this post

Share on facebook
Share on twitter
Share on linkedin
Share on pinterest