Willemstad 3 febrüari 2021 – 19 di yanüari 2021 – Riba 19 di mart próksimo, Kòrsou lo tin su elekshon despues di 4 aña ku Gabinete Rhuggenaath a sinta. Germône de Lima, un di e vishonarionan di partido polítiko VISHON, ta mustra riba e echo ku riba e dia aki, nos tur ku tin 18 aña bai ariba, i ta kumpli ku e kondishonnan pa por vota, por hasi uso di nos derecho sagrado ku demokrasia a duna nos. Un Derechi ku ta duna nos e poder di por kambia e direkshon di nos Pais. Direkshon pa igualdat, hustisia sosial i laboral, tambe nos relashon ku Reino, tur basá riba lokual ta korekto i bon pa nos Pais.
Lamentablemente, por a señalá ku durante e último elekshon, diferente di nos hendenan vulnerabel i den nesesidat a wòrdu malhusá ku plaka of otro material, esaki a kambio di nan derechi demokratiko di por vota. E personanan vulnerabel aki a risibí plaka of otro material i konsekuentemente mester a vota riba esun ku a kumpra nan derechi demokratiko i sagrado. Komo prueba, e personanan mester a saka un portret ku nan selular na momentu ku nan a kaba di vota.
Resientemente mes, durante pre-elekshon último, hopi ta e votadonan ku a saka potrèt di nan stem-biljet i a manda esaki pa otro. Nos tin diferente prueba di esaki tambe.
Awor, ta importante pa enfatisá ku e derechi pa por vota ta unu di privasidat. “Na mi opinion selular no por, ni mag drenta den e urna na unda ta bai vota. Meskos ku den nos prizon SDKK tampoko no por drenta ku un sellular, i tin manera pa detektá i kontrolá esaki”, asina Germone ta indika.
Ta hopi importante pa menshoná ku e hecho di kumpra voto ta kastigabel segun nos leinan (art.2:44 di nos kódiko penal) i ku saka kualke potrèt tambe ta kontra di lei (art. 68a Kiesreglement – bijlage d). E artíkulo aki ta splika ku:
“ E votado ta prohibí pa saka kopia di kualke forma,kompleto of parsial di e stembiljet, pa salbaguardiá e derechi di voto. Bou di kopia kier men potrètnan fotografiko”.
Esaki ta e úniko manera pa salbaguardiá nos sobrenia i demokrasia.
Sinembargo nos di VISHON ta boga pa tin mas kontròl na e urnanan p’asina evitá ku un persona por saka potrèt di kualke forma di nan stem-biljet. Si tin un lei ku ta pone ku e kompra di voto ta kastigabel, i ku tambe saka potrèt di bo stembiljet ta prohibí, ta prudente ku tin e instrumentunan tambe pa kontrolá e lei aki, sino e lei ta palabra morto riba papel.
Demokrasia mester prevalesé semper i un elekshon mester reflehá honestamente e deseo di Pueblo, sin ku mester kumpra voto di ningun hende! Ta e úniku manera pa trese kambio duradero. Germône ke hasi un i tur konsiente ku e plaka ta temporal i despues 4 aña largu lo bo keda lamentá e maneho ku kisas abo no tabata ke.
Kiesreglement Curaçao (bijlage d)
Artikel 68a
- Het is ter waarborging van het kiesrecht de kiezer verboden volledige of gedeeltelijke kopieën in welke vorm op welke media dan ook van het stembiljet te maken.
- Onder kopieën als bedoeld in het eerste lid wordt mede verstaan fotografische portretten.
