E krísis ta fasilitá populismo

Willemstad 22 di Febrüari 2021 – Manera kustumber, ta hasi diferente promesa na komunidat durante periodo di elekshon, ku e meta pa hala mas tantu voto posibel. Na momento ku e promesanan aki ta mustra bunita di pafó, pero no por wòrdu kumplí den realidat, nos ta papia di populismo. Populismo ta un forma di hiba polítika, kaminda e kontraste ta esun ku tin entre “pueblo” ku e “élite”, i kaminda e populista ta skohe e banda di “pueblo”. Awor aki e krísis di COVID-19 a mustra nos tur ku tin un repartishon grandi entre pober ku riku riba e isla aki. E populistanan ta usa esaki pa nan benefisio/probechá di e situashon aki.

15.000 empleo
Tin un partido ku e lema Kòrsou T’ei Krese”, remarkabel ta ku e lider di e partido aki na e momentonan aki ta minister di Desaroyo Ekonómiko. E ministerio aki resientemente a publiká un nota di maneho yamá “iedereen aan het werk” (tur hende man na obra). Rekuperá loke a bai pèrdí i bini ku 15.000 kupo di trabou den seis aña. E nota di maneho aki ta basá riba e balotashon di desempleo  di CBCS i IMF ku ta indiká ku pa 2020 e desempleo lo subi te na 30% di e poblashon laboral. Pa 2019 CBS a kalkulá un poblashon laboral di 61.547 persona. Si e balotashon di CBCS i IMF ta kuadra, ta nifiká ku den 2020 Kòrsou tabatin alrededor di 18.000 hende sin trabou. Konforme e plannan di e Minister di Desaroyo Ekonómiko, den e senario deseá, den seis aña nos lo krea 33.000 kupo di trabou (18.000+15.000). Entre 2017 i e krísis di COVID-19 e grupo di trahadó a subi ku 2.600. Ku no ta “desente” ku un minister ta usa su ministerio pa skirbi un parti di su programa di partido nos ta laga pasa, pa “rèspèt”. Pero pa krea 33.000 kupo di trabou, e mester por simplifiká nos sistema di impuesto, hasi nos legislashon di labor mas fleksibel, eliminá “red tape” i baha e gastunan di hasi negoshi promé ku e por yega na krea 33.000 kupo di trabou. Pero, tur esaki no tabata pará den programa di gobernashon di 2017?

Subida di sueldo pa dosentenan
Manera e situashon ta awor aki, e dosentenan ta entregá muchu mas ku e 12,5% ku gobièrnu mester ekonomisá segun e landspakket riba e kondishonnan di labor di sektor públiko. Pa remediá esaki, e minister di Enseñansa a manda un mensahe via vidio rònt kaminda el a primintí pa promové un grupo di dosente entrante promé di ougùstùs di e aña aki. Un konfirmashon, dokumentashon i elaborashon di esaki no a tuma lugá. E dosentenan no sa si e promesa aki ta keda despues di elekshon. E partido ta yama tur hende pa sigui kana ku nan. E votadó ku ta krítiko lo mester a ripara ku den e kuater añanan tras di lomba nan a para ketu ketu.

Ònderstant pa ANG1.100
Un otro partido mas ta hasi e promesa pa hisa e ònderstant i hasi’é ANG 1.100. Un pensamentu noble, pero no ta e medida ku lo yuda nos isla durante un krísis. Segun CBS den 2020 tabata tin sigur 8.200 persona ku ta kobra ònderstant. Esaki ta kosta nos landskas kasi  ANG 33 mion. Si e partido aki bini na maneho, e ta dispuesto pa subi esaki na kasi ANG 109 mion. Un detaye remarkabel ta ku e nòmber di e partido aki ta Kòrsou tin Trabou. Nos ta ferwagt ku e subida di ònderstant na ANG 1.100 tin e efekto ku e ta hala mas hende pa kobra ònderstant dor ku e ta yega serka di e sueldo mínimo. E motivashon pa hende bai traha ta kita por kompleto. Ku e medida aki e partido no ta hasi honor na su nòmber den niun sentido.

Legalisá 15.000 kas (òf tereno)?
E mes un partido ke subi ònderstant ta primintí pa legalisá 15.000 tereno di gobièrnu ku ta okupá ilegalmente.

Kon e partido a yega na e konklushon ku aktualmente tin 15.000 tereno di gobièrnu ku a repartí ilegal no ta konosí. Aunke ta zona masha noble pa legalisá e terenonan aki, tin algun desbentaha mará na esaki. Legalisashon di e terenonan aki ta habri e porta mas akto ilegal. Un otro problema ku e legalisashon ta trese kuné ta ku e tin influensia riba e desaroyo di nos infrastruktura. Den EOP a indiká ku ta bai krea un di dos “ring” komparabel ku Schottegatweg Rond. E “ring” aki lo mester kontribuí na seguridat den tráfiko i aksesibilidat. Un parti di e terenonan aki ku mester hasi legal ta stroba pa por traha un “tweede ring”. Un bon idea pa e periodo di kampaña, pero e lo ta funesto pa desaroyo riba término largu.

Kinderbijslag (plaka pa yu) di ANG 230 (Euro 112)
E partido ku lo ke bira un munisipo di Hulanda ta primintí pa alsa diferente asuntu na nivel Hulandes. Esaki lo mester resultá den un ònderstant di ANG 2.365, un sueldo mínimo di ANG 3.637 i kinderbijslag di ANG 230. Tokante e promesanan di ònderstant nos a duna nos opinion kaba. Kinderbijslag ta un benefisio sosial deskonosí na Kòrsou. Na Hulanda, dependé e edat, pa kuartal ta paga un montante entre 233 i 319 Euro. Esaki ta impliká ku e montante primintí di ANG230 ta unu mensual. Awor aki Kòrsou ta konta na total 29.733 mucha ku ta bini na remarke pa e kinderbijslag (entre 0 ku 17 aña). Esaki ta nifiká ku e benefisio sosial aki lo kosta nos landskas ANG 82 mion.

E mes un partido aki ta partidario pa baha e kantidat di embaraso bou di hóben i hasi e “spiraal” mandatario. E partido aki di un banda ke limitá e libertat di adultonan pa haña yu, pero di e otro banda ke rekompensá e mes un adultonan aki pa nan deseo di haña yu.

AOV na ANG 1.000 i baha e edat di penshon bek na 60 aña
Dor di subi AOV na ANG 1000 i baha e edat di penshun bek na 60 aña, e lastu so lo sòru ku mesora lo bini 11.000 persona pa AOV aserka. Si kalkulá esaki, esaki lo kosta nos landskas ANG 132 mion pa aña èkstra pa solamente e grupo entre 60 ku 65 aña. Tur hende grandi ku awor aki ta risibí AOV ta haña ANG 1600 aserka pa aña. Na e momentonan aki ta biba 28.400 persona ku tin 65 aña òf mas riba Kòrsou. Banda di esaki tin diferente hende grandi den eksterior tambe ku tin derechi riba AOV. No por kalkulá (ainda) kiko ta kostonan total adishonal di e promesa populista aki a base di e informashon disponibel. Pero e siudadano krítiko mester por mira ku esaki ta impagabel. E partido ku ta pretendé ku Kòrsou ta di nos tur, ku e promesa aki ta bira lomba pa tur dunadó di trabou, trahadó i nos hubentut, paso ta nan lo tin ku paga e kuenta aki.

Vota konsiente
Tuma informashon di tur partido i vota konsiente. VISHON no ta partisipá na e promesanan populista ku diariamente ta wòrdu hasí na pueblo. VISHON ke duna prioridat na enseñansa i desaroyo ekonómiko. Únikamente dor di hasi esaki, nos lo por atendé ku e problemanan riba nos isla di un forma sostenibel. E enfoke lo ta riba e ehekushon, pasó hopi di e plannan ta riba mesa kaba.

Nos programa di partido ta duna un splikashon amplio tokante nos vishon i intenshonnan di maneho di e 4 te 10 añanan benidero. Por download nos programa di partido riba www.vishon.cw òf riba nos página di Facebook.

Share this post

Share on facebook
Share on twitter
Share on linkedin
Share on pinterest