Dikon digitalisashon no tabata realmente un prioridat?

Dikon digitalisashon no tabata realmente un prioridat?

Willemstad 25 Febrüari 2021 – Dikon digitalisashon i inovashon no tabata realmente un prioridat e último 4 añanan aki? Dikon no a hasi mas uso di medionan ku ta disponibel pa alsa kalidat di bida pa nos siudadanonan? Esaki ta preguntanan ku sr. Joûrich Christina, kandidato di partido polítiko VISHON, ta hasi na partidonan ku a forma parti di gobernashon e último 4 añanan aki.

Digitalisashon i inovashon ta relativamente fasil pa implementá. Mester kita for di e mito ku e prosesonan aki ta kompliká i kostoso. Hasiendo uso di solushonnan simpel i chikí, ya por krea resultadonan hopi efisiente pa kualkier organisashon ku ke logra un sierto meta.

Na 2019 komo hoben empresario, Joûrich Christina, huntu ku su koleganan, kier a duna nan kontribushon na nos pais su proseso di inovashon pa medio di algun proyekto i solushonnan digital ku nan a desaroyá. Asina nan a krea e plataforma Curaçao 311, un plataforma ku a resultá e máksimo ganadó di e Curaçao Innovation Award 2019. Un plataforma ku a keda kreá denter di algun siman i totalmente grátis.

Meta di e kreashon di e plataforma aki ta pa stimulá inklushon i tambe pa alsa e sintimentu di responsabilidat sosial bou di nos habitantenan. Kada siudadano por sinti su mes involukrá den e proseso pa yega na solushonnan mas efisiente i duradero pa nos problemanan. Ta kada siudadano su responsabilidat di yuda kuida nos dushi isla i di yuda señalá situashonnan i akshonan ku mester wòrdu mehorá pa bienestar di komunidat kompletu.

Atrabes di e mobile app, kada siudadano por saka un potrèt huntu ku su geo-location i tira lus riba problemanan ku nos ta enkontrá den nos bida diario riba nos isla. Kasonan manera entre otro buraku den kaminda, dùmpmentu di shushi ílegal, daño na infrastruktura, falta di aksesibilidat pa personanan ku desabilidat, produktonan ku a kaduká i vandalismo. E siudadano por hasi esaki ANÓNIMAMENTE pa protekshon di su identidat.

Na momentu ku e krisis di COVID-19 a presentá, a agregá kategorianan manera violashon di toque de queda i tambe violashon di distansia sosial i medidanan kontra aglomerashon na e plataforma. Komo fundashon, diferente ministerionan, kuerponan i instansianan gubernamental a wòrdu aserká i ofresé akseso gratuitamente na e plataforma aki pa asina por hasi uso di e datonan kolektá pa por krea maneho mas efisisiente i dirigí na kada un di e problemanan aki. Pero lamentablemente esaki NO a tuma lugá. Hopi dato interesante i relevante pa un mihó maneho no a keda analisá.

Inovashon i digitalisashon ta simpel i barata, basta ku realmente tin e interes i boluntat pa implementá esakinan. Nos tur por a tuma nota kon, den e siman ku a kaba di transkurí, a lansa registrashon pa bakuná di forma telefóniko. Dikon no a agregá mesora un simpel Google Form di forma ku un siudadano por tin e opshon pa registrá online i no sinti su mes obligá na sinta i hasi yamada sin por keda kla na un manera mas lihé?

Inovashon i digitalisashon mester ta prioridat di bèrdat den e próksimo gobernashon. Pa nos ekonomia por krese, nos mester por funshoná i kompetí na nivel di e merkado komersial global. Pa fasilitá e transishon ei komo pais, nos mester kuminsá ku nos aparato públiko i nos sektor di enseñansa pa asina nos por prepará nos profeshonalnan ku mester karga nos ekonomia riba merkado internashonal. VISHON i su ekipo di profeshonalnan riba e materia aki ta para kla pa hiba nos pais na ekselensia digital.

Share this post

Share on facebook
Share on twitter
Share on linkedin
Share on pinterest